Ukawa JK watoana jasho

• Ukawa waomba Bunge liahirishwe

KIKAO kati ya Rais Jakaya Kikwete na Wajumbe wa Kituo cha Demokrasia Tanzania (TCD) kilichofanyika mjini hapa kujadili mwelekeo wa Bunge Maalumu la Katiba, kimejaa siri nzito.

Taarifa zilizopatikana jana baada ya kikao hicho kilichohusisha wajumbe wa Umoja wa Katiba ya Wananchi (Ukawa), zinasema wakati wa mjadala na Rais Kikwete, wajumbe wa Ukawa walieleza umuhimu wa Bunge Maalumu la Katiba kuahirishwa kwa kuwa taratibu za kuliendesha zimekiukwa.

Baada ya wajumbe hao kueleza kwa nyakati tofauti juu ya suala hilo, Rais Kikwete alisema hawezi kutoa uamuzi wa moja kwa moja kwa kuwa suala hilo linahitaji tafakari ya kina.

“Mjadala ulikuwa mzito kwa sababu baadhi ya wajumbe hasa hasa wanaounda Ukawa walieleza umuhimu wa Bunge Maalumu la Katiba kuahirishwa.

“Baada ya kuelezwa hoja hizo, Rais akasema amewasikia na akasema ngoja akatafakari hoja zao na wao waendelee kutafakari juu ya mapendekezo yao,” kilisema chanzo chetu cha habari ambacho hakikutaka kutajwa jina.

Wakati hayo yakiendelea, Mwenyekiti wa TCD, John Cheyo, aliwaambia waandishi wa habari, kwamba baada ya mjadala mzito walikubaliana kukutana tena na Rais Kikwete Septemba 8 mwaka huu.

“Ndugu waandishi wa habari, leo (jana) wenyeviti na makatibu wa vyama vya siasa vinavyounda TCD tulikutana na rais kujadili ajenda mbili. Ajenda ya kwanza ilihusu mchakato wa Bunge Maalumu la Katiba na ajenda ya pili ilihusu mambo ya kuimarisha kwa ajili ya uchaguzi mkuu wa mwaka 2015.

“Rais amekubali kuangalia mambo tuliyomweleza na akatuomba na sisi wajumbe wa TCD tukayatafakari huku ya yeye akiendelea kuyatafakari ili tukutane Septemba 8 mwaka huu.

“Kwa kuwa jambo hili ni muhimu, tumeunda kamati ndogo itakayoangalia mambo yaliyozungumzwa na kuyatolea ufafanuzi kisha kamati hiyo itawasilisha ripoti yake Septemba 8 tutakapokutana,” alisema Cheyo.

Aliwataja wajumbe wa kamati hiyo ndogo kuwa ni Mwenyekiti wa Chama cha Wananchi (CUF), Profesa Ibrahimu Lipumba, Katibu Mkuu wa Chadema, Dk. Wibrod Slaa, Katibu Mkuu wa CCM, Abdulrahman Kinana na Mwenyekiti wa NCCR-Mageuzi, James Mbatia.

Kabla ya Rais Kikwete kukutana na wajumbe wa TCD, wajumbe hao walianza kukutana wenyewe katika Hoteli ya Dodoma na kujadiliana mambo ya kuzungumza pindi watakapokutana na Rais Kikwete.

Baada ya kutoka hapo, walielekea Ikulu ndogo iliyoko Kilimani mjini hapa. Hata hivyo, kabla Rais Kikwete hajakutana na TCD, inasemekana alikuwa na mazungumzo na Waziri wa Nchi, Ofisi ya Rais, Uhusiano na Uratibu, Steven Wasira pamoja na Waziri wa Nchi, Ofisi ya Waziri Mkuu, Sera, Uratibu na Bunge, William Lukuvi.

 Wakati huo huo, wajumbe hao walipomaliza kikao chao na Rais Kikwete, walikutana katika Hoteli ya St Gasper ambako walikuwa na mazungumzo ya zaidi ya masaa mawili.

Taarifa zilizopatikana katika kikao hicho zinasema Makamu Mwenyekiti wa CCM Tanzania Bara, Phillip Mangula, nusura achafue hali ya hewa baada ya kuwataka Ukawa warudi bungeni wakati mazungumzo yakiendelea.

Kwa mujibu wa taarifa hizo, kauli hiyo ilionekana kuwakera baadhi ya wajumbe  wa Ukawa wakiwamo Profesa Lipumba na Naibu Katibu Mkuu, Magdalena Sakaya ambao walilazimika kumpinga wazi wazi.

Wakati wa mijadala ya vikao hivyo, CCM waliwakilishwa na Kinana na Mangula. Chadema waliwakilishwa na Dk. Slaa pamoja na Mbunge wa Singida Mashariki, Tundu Lissu. Kwa upande wa NCCR-Mageuzi, alikuwapo Mbatia na Katibu mkuu wake, Mosena Nyambabe wakati CUF waliwakilishwa Profesa Lipumba pamoja na Sakaya.

Kwa upande wa UDP alikuwapo Mwenyekiti wa UDP, John Cheyo na mdogo wake Isack Cheyo. TLP alikuwapo Mwenyekiti wa chama hicho, Augustine Mrema na Fahmi Dovutwa aliviwakilisha vyama visivyokuwa na wabunge bungeni.

Share on Google Plus

About Unknown

This is a short description in the author block about the author. You edit it by entering text in the "Biographical Info" field in the user admin panel.