MALINZI AWATAKA MAKOCHA KUJIKITA KUKUZA VIPAJI, APONDA NYOTA WA KIGENI

 MOSHI: JAIZMELALEO

Rais wa Shirikisho la Soka nchini (TFF) Jamal Malinzi amewataka makocha kujikita zaidi katika kuzalisha vipaji vya soka ili kuondoa uwepo wa nyota wengi wa kigeni wanaoingia kwa kasi nchini.

Akizungumza katika siku ya mwisho ya mafunzo ya ukocha ngazi ya awali mkoani Kilimanjaro iliyoandaliwa na Mkombozi Vocational Training Centre na kufanyika mjini Moshi alisema nyota wengi wa kigeni wamekuwa wakitiririka nchini kwa kasi ya ajabu kusaka bahati yao huku hazina ya wanasoka wa ndani ikiwa finyu.

Jamal alisema ni msimu wa nne sasa katika Ligi kuu wafungaji bora wamekuwa ni nyota wa kigeni hali ambayo imekuwa ikitengeneza timu ya taifa isiyo na kiwango cha juu.

Rais huyo aliongeza kusema makocha waliohitimu mafunzo hayo wanapaswa kuitendea haki nafasi hiyo adhimu, na kuwataka kuvitumia vyeti vyao sawasawa na maelekezo yake.

Hata hivyo Malinzi aliwataka makocha kuepukana na usimba na uyanga katika kuvikuza vipaji vya soka kwani siasa imetawala katika vilabu hivyo vikubwa hapa nchini, badala ya kuibua vipaji imekuwa ikiua.

Aidha Jamal alisema mwaka ujao TFF itatoa kozi ya kati (intermediate course) ya ukocha mkoani humo na kuongeza kwamba Chuo cha Mkombozi kitaingizwa katika program ya vyuo 53 nchini ya kukuza soka la wanawake chini ya hisani ya serikali ya Sweden.

Kozi hiyo ya majuma mawili iliwakusanya makocha wa mchezo wa soka kutoka mkoani humo na kuratibiwa na chuo hicho ambapo Malinzi aliongozana na Mwenyekiti wa vyama vya soka nchini Eliud Mvela.

Katika ziara yake mkoani humo alikabidhiwa ekari 20 kwa ajili ya ujenzi wa uwanja wa kisasa katika wilaya ya Siha.

Share on Google Plus

About Unknown

This is a short description in the author block about the author. You edit it by entering text in the "Biographical Info" field in the user admin panel.