Chelsea: Kuleni, Shangilieni lakini Msilale kwenye Sherehe.

 

 

 

 

Kwa Msaada wa Daily Mail.

Mwaka mmoja una siku 365, siku ambazo zinaweza kuwa na mabadiliko kwa kiasi kikubwa, siku ambazo jua linazama, linachwea, kunatokea mvua kisha kiangazi. Mojawapo ya wanaoweza kuwa na simulizi ya kusisimua juu ya utofauti huu ni klabu ya Chelsea na mashabiki wake.

Miezi 12 kamili iliyopita kama leo, Chelsea walikuwa chini ya Kocha Jose Mourinho akishuhudia wakipoteza mchezo nyumbani kwa Leicester City ikiwa ni moja kati ya viwango vibovu vya bingwa mtetezi. Hii ilimaanisha kuwa mmiliki wa klabu hiyo, Roman Abramovich alikuwa amekula na kuvimbiwa, hakuhitaji tena ladha ya chakula anachopika Jose Mourinho, na wiki hiyo alimtimua.

Kumbukumbu mbaya sana lakini katika siku nzuri kama ukiamua kulinganisha ama kufananisha. Jaribu kufikiri mkosi ule na Chelsea ya Leo, wapo katika nafasi ya kwanza, wanaongoza kwa pointi sita na wanao uhakika wa kuongoza mpaka kipindi cha Christmas, huku pia rekodi zikionyesha kuwa katika mara nne zilizopita ambazo waliongoza mpaka wakati wa Christmas, walimaliza kwa kuwa mabingwa.

Hiki ni kipindi  cha Keki na Mvinyo kwao, sherehe na matarumbeta, vigeregere na vifijo. Hakuna wa kuwazuia kuwa hivyo, na kile ambacho Mourinho alikifanya kionekane kigumu Antonio Conte anakifanya kiwe rahisi. Ushindi dhidi ya Sunderland ulikuwa ni wa kumi mfululizo kwao, na kama wakipata ushindi mara tano mfululizo watakuwa wanaweka rekodi yao mpya wakivunja ile ya Arsenal ya mwaka 2002.

Hata Antonio Conte amegusia na kusema: Ni raha iliyoje kushinda michezo 10 mfululizo kwenye ligi hii, kwa sababu ni ngumu mno. Inabidi kupigana katika kila mchezo, wachezaji wetu wanastahili hili kutokana na kujituma kwao na nguvu kazi yao kila siku kwenye michezo tunayohusika.

Lakini sipendi kutizama msimamo wa ligi kwani ligi haijamalizika leo.’

Inaonekana kabisa kuwa kuna utulivu na mamlaka kwa upande wa Conte, kama ilivyokuwa kwa klabu na wachezaji anaowaongoza. Huku Mourinho hakiwa aliyekuwa amepoteza mamlaka ya vyumba vya kubadili nguo, Muitaliano huyu ameweza kuwafanya wachezaji wake wote kucheza katika kiwango ambacho hakuna aliyekiona msimu uliopita.

Anathubutu hata kuwaruhusu kunywa bia kiasi baada ya kila mchezo, ukaribu wao ni mkubwa na mafanikio yao mpaka sasa ni kama yamewalevya mashabiki.

Naam, tukizingumzia kila mchezaji kuwepo anapohitajika ni kama walivyohitaji kipa wao Thibaut Courtois kufanya kazi kubwa kuokoa mpira uliopigwa na Patrick van Aanholt katika dakika za mwisho ambao ungeweza kumaanisha wametoka sare.

Cesc Fabregas alikuwa ni moja kati ya wachezaji ambao hawakuwa kwenye maelewano na Jose Mourinho huku pia akianza msimu akiwa benchi lakini katika mara zote alizohitajika amefanya vyema huku pia akiwa mfungaji wa bao la ushindi dhidi ya Sunderland.

‘Nina furaha kubwa na Cesc,’ alisema Conte. ‘Ni mfano wa kuigwa kwa wachezaji wengine. Pamoja na kuwa ni mara ya tatu pekee anaanza msimu huu, lakini amekuwa ni mtu mwenye kujituma kwa kiasi kikubwa.’

Kwa upande wa Sunderland na David Moyes, bahati mbaya ipo upande wao kwani hii inakuwa ni mara ya 11 wanapoteza huku pia ikija baada ya kocha huyo kufanya mazungumzo na mtendaji wa klabu hiyo Martin Bain ambaye alimwambia kuwa klabu haitojaribu kujinasua kutoka mkiani kwa kuingia sokoni mwezi Januari.

Kauli iliyomkera kocha huyo kwa kiasi kikubwa.

Huu ni muda wa Chelsea, ni wakati wao, wanaweza kunywa wanavyotaka, wanaweza kushangilia kwa nafasi yao, waruke watakavyojisikia kwa sababu wana kila keki wanayotaka na visu vipo mikononi mwao. Kikubwa ni kutokulala kwenye sherehe, wataibiwa.

Share on Google Plus

About Unknown

This is a short description in the author block about the author. You edit it by entering text in the "Biographical Info" field in the user admin panel.